NASSIBU ATAMBA KUMCHAPA CHOKI

 

Na Mwandishi Wetu

BONDIA wa ngumi za kulipwa Nassibu Ramadhan ametamba kumchakaza mpinzani wake Juma Choki katika pambano la usiku wa Derby litakalofanyika Juni 29, mwaka huu.  

Akizungumza na mtandao huu Nassibu amesema anataka kuonesha balaa jipya kwa mpinzani huyo kwa kushinda pambano hilo.

“Watu hawajui kuwa Juma Choki alikuwa akinipenda, alikuwa akinifuatilia na kujifunza kwangu, niwaambie tu nimempokea vizuri kwasababu anahitaji kujifundisha,”amesema.

Amesema atamfundisha namna ya kupigana kwani kijana anapenda kujifunza mengi mazuri kutoka kwake na kuwaahidi mashabiki zake wajitokeze kwa wingi kwani hawatomwangusha.

“Tarehe 29 nawaahidi kufanya kazi yangu ambayo sijaifanya kwa muda mefu,”amesema.

Nassibu Ramadhan ni bondia mkongwe aliyecheza mapambano 55 na kati ya hayo ameshinda 35, amepoteza 18 na kupata sare mbili.

Juma Choki ni bondia chipukizi aliyecheza mapambano tisa na kati ya hayo, ameshinda manane na kupata sare moja.